François de Montcorbier dit François VILLON (1431-1463)
Ballade des menus propos
Je congnois bien mouches en laict;
Je congnois à la robe l’homme;
Je congnois le beau temps du laid;
Je congnois au pommier la pomme;
Je congnois l’arbre à veoir la gomme;
Je congnois quand tout est de mesme;
Je congnois qui besongne ou chomme*;________* qui travaille ou chôme
Je congnois tout, fors que moy-mesme.
Je congnois pourpoinct au collet;
Je congnois le moyne à la gonne*; _______________* tunique, froc
Je congnois le maistre au varlet;
Je congnois au voyle la nonne;
Je congnois quand pipeur jargonne;
Je congnois folz nourriz de cresme;
Je congnois le vin à la tonne;
Je congnois tout, fors que moy-mesme.
Je congnois cheval du mulet;
Je congnois leur charge et leur somme,
Je congnois Bietrix et Bellet*; ___________________* Béatrice et Isabelle
Je congnois gect* qui nombre et somme, ____________* jeton servant à compter
Je congnois vision en somme;
Je congnois la faulte des Boesmes;
Je congnois le pouvoir de Romme,
Je congnois tout, fors que moy-mesme.
Prince, je congnois tout en somme;
Je congnois coulorez et blesmes;
Je congnois mort qui tout consomme;
Je congnois tout, fors que moy-mesme.
_____________________________________________________________________________________________
