Illustrations des Œuvres de Maistre François Villon
Bois. Ambroise Vollard, éditeur à Paris 1918
Imprimé sur les presses à bras d’Emile Fequet et par les soins de l’illustrateur Emile Bernard.
BALLADE DES MENUS PROPOS
Je congnois bien mouches en laict;
Je congnois à la robe l’homme;
Je congnois le beau temps du laid;
Je congnois au pommier la pomme;
Je congnois l’arbre à veoir la gomme;
Je congnois quand tout est de mesme;
Je congnois qui besongne ou chomme(1) ;
Je congnois tout, fors que moy-mesme.Je congnois pourpoinct au collet;
Je congnois le moyne à la gonne(2) ;
Je congnois le maistre au varlet;
Je congnois au voyle la nonne;
Je congnois quand pipeur jargonne;
Je congnois folz nourriz de cresme;
Je congnois le vin à la tonne;
Je congnois tout, fors que moy-mesme.Je congnois cheval du mulet;
Je congnois leur charge et leur somme,
Je congnois Bietrix et Bellet(3) ;
Je congnois gect (4) qui nombre et somme,
Je congnois vision en somme;
Je congnois la faulte des Boesmes(5);
Je congnois le pouvoir de Romme,
Je congnois tout, fors que moy-mesme.Prince, je congnois tout en somme;
Je congnois coulorez et blesmes;
Je congnois mort qui tout consomme;
Je congnois tout, fors que moy-mesme.
(1) qui travaille ou chôme
(2) tunique, froc
(3) Béatrice et Isabelle
(4) jeton servant à compter
(5) bohémiens
______________________________________________________________________________
